सार्वभौमसत्ता सम्पन्न जनताको प्रतीकका रुपमा गणतन्त्रः महासचिव पोखरेल
काठमाडौँ । नेपाल कम्युनिष्ट पार्टी (एमाले)ले महासचिव शङ्कर पोखरेलले जनताको बलिदानीपूर्ण सङ्घर्षबाट प्राप्त भएको गणतन्त्र सार्वभौमसत्ता जनताको प्रतीकका रूपमा रहेको बताएका छन् ।
गणतन्त्र दिवसका उपलक्ष्यमा एमालेद्वारा आज यहाँ आयोजित कोणसभालाई सम्बोधन गर्दै महासचिव पोखरेलले मुलुकको विकास र समृद्धिसहित जनतालाई शक्तिशाली तुल्याउने गणतन्त्रको विकल्प नभएको स्पष्ट गरे । उनले गणतन्त्र स्थापनापछि देशका हरेक क्षेत्रमा उल्लेखनीय प्रगति हासिल भइरहेको अवस्थामा पूर्वराजाका नाममा गणतन्त्रमाथि अफवाह फैलाउने काम भइरहकामा चिन्ता व्यक्त गर्दै देश, जनता र गणतन्त्रविरोधी तत्वलाई जनतामाझ ल्याई तिनको भण्डाफोर गरिनुपर्नेमा जोड दिए ।
नेपाली जनताको बलमा आएको गणतन्त्रमाथि धावा बोल्ने काम कदापि सह्य नहुने भन्दै महासचिव पोखरेलले देश, जनता र गणतन्त्रको रक्षाका खातिर जुनसुकै मूल्य चुकाउन आफ्नो पार्टी तयार रहेको स्पष्ट गरे । उनले बहुजातीय, बहुभाषिक, बहुसांस्कृतिक विशेषतासहित समावेशी लोकतान्त्रिक गणतान्त्रिक व्यवस्था स्थापना भएको ऐतिहासिक दिनलाई समग्र राज्यका तर्फबाट हर्षोल्लासका साथ मनाउनुपर्नेमा जोड दिए ।
यसैगरी, एमाले प्रचार विभाग प्रमुख राजेन्द्र गौतमले गणतन्त्र स्थापनासहित यसको सुदृढीकरणमा नेतृत्वदायी भूमिका रहेको एमालेको विभिन्न कार्यक्रमसहित देशव्यापी रुपमा उत्सवमय वातावरणसहित गणतन्त्र दिवस मनाउने निर्णय भएबमोजिम आज पालिका तहसम्म कार्यक्रम भइरहेको जानकारी दिए ।
एमाले नेतागणको नेतृत्व र संयोजनमा यसअघि सहरका विभिन्न स्थानबाट विभिन्न वेशभूषा, बाजागाजा, सांस्कृतिक झाँकी, झन्डा–ब्यानरसहितको ¥याली निस्केको थियो । बिहान ११ः०० बजे रत्नपार्क, भोटाहिटी, बागबजार, सुनधारा, अनामनगरलगायतका विभिन्न स्थानबाट निस्केको ¥याली पुनः प्रदर्शनीमार्गस्थित भृकुटीमण्डपमा पुगी कोणसभामा परिणत भएको हो ।
उल्लासमय वातावरणबीच गणतन्त्र दिवस मनाउने उद्घोषका साथ आयोजित सो कोणसभामा एमालेका वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डेलगायतका शीर्ष नेताहरू सहभागी थिए । त्यस्तै, पार्टीका सचिवालय सदस्य, स्थायी तथा केन्दीय कमिटीका सदस्य, जनवर्गीय सङ्गठनका नेताहरूको समेत सहभागिता रहेको सो सभामा उल्लेखनीय जनसहभागिता रहेको थियो ।
यही जेठ ११ गते बसेको सचिवालय बैठकले गणतन्त्र दिवसको दिन सांस्कृतिक झाँकीसहित देशभर उत्सव मनाउने निर्णय गरेको थियो ।
