काठमाडौँ । नेपाली कांग्रेसका सभापति गगनकुमार थापाले मुलुक र जनताको हितका लागि सबै राजनीतिक शक्तिहरू दलगत स्वार्थ र सीमाभन्दा माथि उठेर सहकार्य गर्नुपर्नेमा जोड दिएका छन्। नयाँ वर्ष २०८३ को अवसरमा शुभकामना व्यक्त गर्दै उनले शान्त, सभ्य र आर्थिक रूपले समृद्ध राष्ट्र निर्माणको अभियानलाई सफल बनाउन सबै जिम्मेवार निकायहरू एकजुट हुनुपर्ने बताएका हुन्।
सभापति थापाले नेपाली जनताको लामो त्याग, संघर्ष र बलिदानबाट प्राप्त भएका ऐतिहासिक उपलब्धिलाई जोगाउनु अहिलेको मुख्य दायित्व भएको उल्लेख गरे। उनले ती उपलब्धिको सुदृढीकरण गर्दै भविष्यमा आउन सक्ने राष्ट्रिय चुनौतीहरूको सामना गर्न सबैमा एकताबद्ध संकल्प र अठोट आवश्यक रहेको धारणा राखे। अबको समय नवीन अवसरहरूको सदुपयोग गर्दै सुशासन र आर्थिक विकासको मार्गमा दृढताका साथ अघि बढ्ने बेला भएको उनको भनाइ छ।
नयाँ वर्षले नेपालीहरूबीच आपसी एकता, भाइचारा र सद्भावलाई अझ मजबुत बनाउने विश्वास थापाले व्यक्त गरेका छन्। उनले संघीय लोकतान्त्रिक गणतन्त्रलाई संस्थागत रूपमा बलियो बनाउँदै आर्थिक र सामाजिक समृद्धितर्फ लाग्न नयाँ वर्षले सबैलाई नयाँ ऊर्जा, उत्साह र प्रेरणा प्रदान गरोस् भनी शुभकामना दिएका छन्। राजनीतिक दलहरू केवल सत्ताको खेलमा मात्र नलागी समृद्धिको साझा लक्ष्यमा केन्द्रित हुनुपर्ने सन्देश उनले प्रवाह गरेका छन्।
