काठमाडौँ । पूर्व उर्जामन्त्री एवं कांग्रेस नेता दीपक खड्कालाई जेनजी आन्दोलन हुँदा उनको घरबाट बरामद रकमबारे अनुसन्धान गर्न नियन्त्रणमा लिइएको गृहमन्त्री सुधन गुरुङले बताएका छन् ।
सामाजिक सञ्जालमा खड्कालाई दिएको जरुरी पक्राउ पुर्जी सार्वजनिक गर्दै गुरुङले भनेका छन्, ‘गत भदौ २४ गते आन्दोलनको क्रममा निजको निवासबाट बरामद रकमको अनुसन्धानको सिलसिलामा आज नियन्त्रणमा लिइएको छ ।’
जेनजी प्रदर्शन हुँदा आन्दोलनकारीले उनको घरमा आगजनी गरेका थिए । आगजनी हुँदा जलेको रकम सम्पत्ति शुद्धीकरण अनुसन्धान विभागले सङ्कलन गरेको थियो । उनलाई आइतबार बिहान केन्द्रीय अनुसन्धान ब्युरो (सीआईबी)बाट खटिएको टोलीले पक्राउ गरेको हो ।
