काठमाडौं । नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ को सचिवालयबाट गंगा दाहालले राजीनामा दिएकी छन् । आफूलाई देखाएर निरन्तर प्रचण्ड र पार्टीविरुद्ध योजनावद्ध रुपमा प्रहार भइरहेको भन्दै उनले राजीनामा दिएकी हुन् । उनले सामाजिक सञ्जालमार्फत भनेकी छन्, ‘निरन्तर मलाई देखाएर नेकपा (माओवादी केन्द्र) का संयोजक प्रचण्ड र समग्र पार्टीविरुद्ध योजनावद्ध प्रहार भइरहेका कारणले गर्दा मैले संयोजकको सचिवालयबाट राजीनामा दिएकी छु ।’
उनले आफू पार्टीको जिम्मेवार कार्यकर्ता भएकाले आजीवन रूपमा पार्टीमा भने क्रियाशील रहने बताएकी छन् । सचिवालयमा रहँदा पार्टीका नेताहरू, कार्यकर्ताहरू र आम नागरिकले गरेको सहयोगप्रति उनले आभार व्यक्त गरेकी छन् ।
आफ्नो बारेमा पछिल्लो समयमा बिभिन्न सञ्चार माध्यममा भ्रामक भ्रामक समाचारआएको प्रति गम्भीर ध्यानाकर्षण भएको पनि उनले बताएकी छन् । प्रचण्डको सचिवालयमा भाइ प्रकाश दाहालको देहवसानपछि आमा सीता दाहाल बिरामी भएको अवस्थामा पार्टी निर्णयअनुसार जिम्मेवारी लिएरको पनि उनले बताएकी छन् ।
आमाको हेरचाह पनि गर्नुपर्ने र भाइ प्रकाशले निभाउँदै आएको भुमिकामा रहेर अध्यक्षलाई सहयोग गर्न पार्टी नेताहरुको सल्लाहामा सचिवालयमा रहेर आफुले सकेको सहयोग निस्वार्थ भावमा पार्टी आन्दोलन र बुवाको लागी गर्ने कोशिस गरेको पनि उनले बताएकी छन् । उनले आफूले आफ्नो लागी सोचेर कहिले पनि काम नगरेको दाबी पनि गरेकी छन् ।
