भैरहवा । रुपन्देहीको बुटवलस्थित सुप्रिम सहकारी सहकारी संस्थाको रकम ठगी र संगठित अपराधको अभियोगमा पूर्पक्षका लागि थुनामा रहेका राष्ट्रिय स्वतन्त्र पार्टीका सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दामा सुनुवाइका लागि पेसी तोकिएको छ ।
उच्च अदालत तुलसीपुर बुटवल इजलासका सूचना अधिकारी रामबहादुर कुवँरका अनुसार मुद्दाको न्यायाधीश वासुदेव आचार्य र ओमप्रसाद अर्यालको एक नम्बर संयुक्त इजलासको क्रम संख्या तीन नम्बरमा पेशी तोकिएको हो ।
उक्त मुद्दाको गत कार्तिक १३ गते पेशी चढेको थियो तर, सो दिन जोशीका कानुन व्यवसायीको तर्फबाट निवेदन दिएपछि सुनुवाइ स्थगित भएको थियो । अदालतले एउटै प्रकृतिको मुद्दा भएकाले रवि र छविको मुद्दा एकैसाथ राख्न यसअघि आदेश गरेको थियो । लामिछानेसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरेर अभियोग पत्र दायर गरिएको छ।
लामिछानेले चार भागमध्ये आफ्नो एक भागको बिगो रकम २ करोड ७४ लाख ८४ हजार रुपैयाँको बैंक जमानत दाखिला गर्दा जिल्ला अदालत रुपन्देहीले रिहा गर्न अस्वीकार गरेको थियो।
छविलाल जोशीले पनि बिगोबापतको जमानत पेस गरेका थिए। तर, दुवै प्रतिवादीको हकमा भागमा कति बिगो कायम हुने भन्ने नै यकिन नभएकाले रिहा गर्न नमिल्ने एकै प्रकृतिको आदेश भएको थियो।
बिगो बमोजिमको रकम बुझाएर थुना बाहिर बसेर मुद्दा लड्न पाउँ भनी उच्च अदालतमा निवेदन दिएकोमा अदालतले दुवै मुद्दासाथै राख्ने आदेश गरेको थियो। लामिछाने पूर्पक्षका लागि नख्खु कारागारमा छन् भने जोशी भैरहवा कारागारमा छन् ।
