सिराहा । सशस्त्र प्रहरी बल, नेपाल नं. ७ गण हे.क्वा. सिराहाले आर्थिक वर्ष २०८१/०८२ मा सीमा सुरक्षा, राजश्व अभिवृद्धि, लागुऔषध नियन्त्रण तथा विपद् व्यवस्थापनमा उल्लेखनीय सफलता हासिल गरेको छ। गणले आफ्नो संगठनात्मक जिम्मेवारी कुशलतापूर्वक निर्वाह गर्दै राष्ट्रिय सुरक्षामा प्रभावकारी योगदान पुर्याएको जनाएको छ। सिराहा जिल्लामा हाल सशस्त्र प्रहरीको एउटा गण, प्रस्तावित सीमा सुरक्षा गुल्म दुइवटा, पाँच वटा बोर्डर आउटपोष्ट (BOP) र पाँच सुरक्षा बेससहित कुल १३ युनिट सञ्चालनमा रहेका छन् । ती युनिटहरूले सीमा क्षेत्रमा चोरी, तस्करी, लागुऔषध कारोबार तथा अन्य गैरकानुनी गतिविधिमा कडा निगरानी गर्दै आएका छन् ।
सिराहाबाट सशस्त्र प्रहरीले आर्थिक वर्ष २०८१/०८२ मा लत्ताकपडा, किराना, हार्डवेयर, इलेक्ट्रोनिक्स, औषधी, मदिरा, पशुचौपाया, नगद, काठ, नदीजन्य पदार्थ र सवारी साधनसहित करिब ९ करोड ६० लाख रुपैयाँ बराबरको भन्सार छलिसमेतका सामानहरू बरामद गरेको छ । जसमध्ये लत्ताकपडा २ कराेड ६६ लाख, किराना सामान २ करोड २० लाख, हार्डवेयर ४३ लाख ५० हजार, इलेक्ट्रोनिक्स ४० लाख ७१ हजार, मदिरा २३ लाख ५१ हजार, पशुचौपाया १३ लाख ५६ हजार, नगद ४ लाख, सवारीसाधन (मो.सा. २२२, ट्रयाक्टर २१, पिकअप/स्कार्पियो ६ आदि) गरी ३ कराेड ३७ लाख रहेकाे छ । गत वर्षको तुलनामा यो वर्ष झण्डै १ करोड १९ लाख रुपैयाँ बढी अवैध सामान नियन्त्रणमा लिइएको हो । त्यस्ता गतिविधिमा संलग्न १५ जना व्यक्तिहरूलाई समेत नियन्त्रणमा लिई सम्बन्धित निकायमा बुझाइएको छ । सशस्त्र प्रहरीको सक्रियताका कारण माडर, ठाडी र बरियारपट्टी भन्सार कार्यालयहरूले आ.ब. २०८१/०८२ मा १९ कराेड ३९ लाख राजश्व संकलन गरेका छन्, जुन वार्षिक लक्ष्यको ११८.५ प्रतिशत हो। त्यसैगरी सशस्त्र प्रहरीद्वारा ३२.७ ग्राम ब्राउन सुगर, २३.४ के.जी. गाँजा, विभिन्न किसिमका लागुऔषध (जस्तै Nitravet Tablet, Diazepam, Buprenorphine Injection, Spasmo Proxyvon, Promethazine Hydrochloride Injection) बरामद गर्दै २१ जना व्यक्ति नियन्त्रणमा लिइएको छ भने कारवाहीका लागि सम्बन्धित निकायमा बुझाएकाे बताएकाे छ । साथै, लागुऔषध विरुद्ध चेतना फैलाउन सडक नाटकहरू समेत प्रस्तुत गरिएको थियो ।
जिल्ला तथा क्षेत्रीय तहमा भएको आन्दोलन, झडप, मेला, चाडपर्व तथा अन्य जोखिमपूर्ण अवस्थाहरूमा सशस्त्र प्रहरी बलले २४ घण्टा परिचालन हुनसक्ने Quick Response Team परिचालन गर्दै शान्ति सुरक्षा कायम राखेको छ। हुल तथा दंगा नियन्त्रणमा तालिम र संयूक्त अभ्याससमेत सञ्चालन गरिएको छ। सीमाक्षेत्रमा सुरक्षा चुस्त बनाउन गणले सीमा गस्ती, LRP, सीमा स्तम्भ मर्मत, रंगरोगन, भारतीय समकक्षी SSB सँग संयुक्त गस्ती र समन्वय बैठकहरू सञ्चालन गरेको छ। सीमावासीहरूसँग अन्तरक्रिया, चापाकल निर्माण, विद्यालयमा स्टेशनरी वितरण तथा निशुल्क स्वास्थ्य शिविर जस्ता कार्यहरूमार्फत प्रहरी जनमैत्री क्रियाकलापमा सक्रिय देखिएको छ। सशस्त्र प्रहरी परिवार महिला संघकाे २४ अाैँ वार्षिक उत्सवका अवसरमा बरियारपट्टीमा रहेकाे जनता माध्यमिक विद्यालयमा आयोजित स्वास्थ्य शिविरबाट ५२२ जना स्थानीय नागरिकहरू लाभान्वित भएका थिए । साथै माडर, इनर्वा र बरियारपट्टीमा ‘हेल्प तथा हेल्थ डेस्क’ स्थापना गरी सीमामा दैनिक ओहोरदोहोर गर्ने नागरिकको सहजता सुनिश्चित गरिएको छ ।
विपद् व्यवस्थापनतर्फ गणले यस आर्थिक वर्षमा १२५ जना घाइते तथा मृतकको उद्धार कार्य सम्पन्न गरेको छ । बाढी, डुबान, सवारी दुर्घटना, आगलागी जस्ता विपद्को बेलामा सुरक्षित स्थानमा स्थानान्तरण, उद्धार र राहत प्रदान गरिएको छ। प्रत्येक वडामा २५ जनाको दरले विपद् सूचक टोली गठन गरिनुका साथै सडक दुर्घटना, भूकम्प तथा मनसुनजन्य विपद्सम्बन्धी संयुक्त सिमुलेशन अभ्यासहरू सम्पन्न गरिएका छन् । विशेषगरी, मनसुनजन्य विपद्लाई मध्यनजर गर्दै सदरमुकाम सिरहा नगरपालिका १ मा २४ सै घण्टा तयारी अवस्थामा रहने अस्थायी विपद् व्यवस्थापन बेस स्थापना गरिएको छ ।
सशस्त्र प्रहरी उपरीक्षक तथा गणपति नरेश भण्डारीका अनुसार, ‘सिरहाको सीमा सुरक्षामा अझ बढी दक्षता, चुस्तता र जनमैत्रीपनसहित सक्रिय भई राष्ट्र र जनताको सुरक्षामा समर्पित रहने प्रतिवद्धता’ व्यक्त गरिएको छ। उनले चोरी, तस्करी, लागुऔषध र हतियार कारोबारजस्ता गैरकानुनी क्रियाकलापविरुद्ध अझ कडाइका साथ अघि बढ्ने बताए। सशस्त्र प्रहरी बल, नेपाल नं. ७ गण हे.क्वा. सिरहाको गत वर्षको कार्यसम्पादन सुरक्षाका सम्पूर्ण मापदण्डमा सन्तोषजनक मात्र होइन, प्रभावशाली उदाहरणीय अभ्यास बन्न सफल भएको छ। सुरक्षाबाट विकास र नागरिक सहायतातर्फ सशस्त्र प्रहरीको दायरा फराकिलो बनिरहेको छ, जुन प्रवृत्तिले सीमावर्ती जिल्ला सिरहाको सुरक्षा अवस्था सुदृढ मात्र होइन, नागरिकमैत्री पनि बनाएको छ।
