रौतहट । बारा प्रहरीले पानी फ्याक्ट्रीका प्रबन्धकको हत्यामा संलग्न रहेको आरोपमा दुई जनालाई पक्राउ गरि सार्वजनिक गरेको छ।
प्रसौनी गाउँपालिका–६ भलुही चोकस्थित किरण बेभरेज नेपाल प्रालि (पानी फ्याक्ट्री) का प्रबन्धक (म्यानेजर) राम किशोर सिंहको हत्यामा संलग्न रहेको आरोपमा प्रहरीले पक्राउ गरेको हो।
फ्याक्ट्री नजिकै रातिको समयमा धारिलो छुरा र इँटाले टाउको थिचेर हत्या भएको अवस्थामा शुक्रबार बिहान शव फेला परेको थियो।
सो घटनामा संलग्न रहेको आरोपमा प्रहरीले पर्सा वीरगञ्ज महानगरपालिका–२२ मनियारीका २१ वर्षीय राजन कुमार राम र उनका साथी सोही ठाउँका ३२ वर्षीय प्रमोद साह तुरहालाई पक्राउ गरेको छ।
घटनास्थल तथा अभियुक्तहरूको साथबाट रगत लागेकै फलामको छुरा १ थान र इँटा १ थान बरामद भएको जिल्ला प्रहरी कार्यालय बाराका निमित्त प्रवक्ता एवम् प्रहरी निरीक्षक खेमप्रसाद नेपालले जानकारी दिए।
उनका अनुसार भारत तर्फ भाग्दै गरेको अवस्थामा राजनलाई र तुरहालाई वीरगंज महानगरपालिका वडा न.२२ मा लुकिछिपि बसेको अवस्था पक्राउ गरिएको हो। प्रहरी अनुसन्धानबाट हत्याको मुख्य कारण पुरानो रिसिइवी र कामबाट निकालिएको रिस रहेको खुलेको छ।
दुवै जनाले फ्याक्ट्रीबाट निकालिएको रिस र विभिन्न समयमा भएको वादविवाद कारण हत्या गरेको प्रहरी समक्षको बताएका छन्। पक्राउ परेका दुवै जनाविरुद्ध कर्तव्य ज्यान मुद्दा दर्ता गरी बारा जिल्ला अदालतबाट ७ दिनको म्याद थप गरी थप अनुसन्धान भइरहेको जिल्ला प्रहरी कार्यलय बाराले जनाएको छ।
